As saídas e visitas: Actividades fóra da aula.

O pasado 4 de maio a proposta da profesora da materia de ciencias sociais aproveitamos para realizar unha visita ao Centro de Interpretación Ambiental de Compostela (CIAC), pareceunos unha actividade de grande interese que permitiu comprender un pouco mellor a cidade. Presenta un modelo de desenvolvemento urbano sostible partindo do seu medio natural e da necesidade da súa preservación cara ás vindeiras xeracións.

Compostela é unha vila na que se produce e consome enerxía, auga e materias primas, onde conviven diferentes ideas, opinións, culturas; e como tal precisan relacionarse entre si e co medio que os rodea. Podemos observar, a través dos contidos abordados nos diferentes espazos, os distintos fluxos de entrada de enerxía, auga e subministracións básicas; os procesos de transformación e uso, e os residuos xerados neles.

CIAC - Centro de Interpretación Ambiental de Compostela -

                              

Aproveitamos esta entrada para destacar que como futuros docentes na etapa de educación primaria esta visita sería de grande interese e destacamos que a través das visitas e saídas fóra da aula proporcionaráselle ao alumnado un contacto directo coa realidade, poderá recibir a información a través doutras canles, de forma activa e amena o que  facilitará o proceso de e-a.

Entendemos que os/as alumnos/as recibirán a información de maneira activa, participativa e significativa. Grazas a estas sesións facilítase a integración das aprendizaxes en relación cos contidos debido ao uso de distintas situacións e contextos.

Coas visitas e saídas fóra da aula traballamos a convivencia e vannos permitir que o noso alumando se adapte e integre no grupo, facilitando unha educación en valores, baseada no respecto das opinións e quendas dos demais así como o respecto aos espazos que esteamos compartindo, interaccionando coa contorna: natural, social ou cultural. Fomentamos deste xeito, unha aprendizaxe rica en estímulos, que permitirá entender a realidade a partir da observación e da análise mediante unha visión crítica. Inculcamos a curiosidade e o interese por coñecer, así coma a creatividade.

Para que estas actividades teñan un bo resultado debemos ter en conta que antes das saídas deberemos realizar unha aproximación sobre o tema a traballar e trasladar ao alumnado o obxectivo das mesmas. Faremos unha posta en común para ver os coñecementos previos e desenvolveranse unha serie de actividades a modo introdutorio. Teremos presentes, se fose necesario, outros tipos de aspectos como normas de seguridade e información aos pais: roupa, horarios, etc. Será relevante  levar a cabo unha aproximación coa organización/entidade na que imos realizar a saída para coordinar e tratar os aspectos que se precisen.

Durante as saídas teremos en conta a organización do grupo, atenderemos e facilitaremos os equipos de traballo. Colaboraremos cos profesionais das entidades no desenvolvemento das actividades que se realicen; planificaremos distintos momentos de exploración, observación e rexistro das cousas que se estimen de interese.

Despois da saída faremos un traballo de revisión e análise dos contidos expostos e aproveitaremos para sacar as distintas conclusións obtidas sobre todo o tratado. Se dispoñemos de tempo, e o entendemos axeitado, poderemos deseñar unha serie de actividades complementarias a modo de peche.

Finalmente como profesionais implicados na nosa tarefa deberemos realizar unha avaliación da saída tendo en conta tanto o desenvolvido polo alumnado como o noso propio traballo.